რუსი პოლიტიკური სტრატეგები აფხაზეთში

აფხაზეთი იძიებს სკანდალს, რომელიც რუს პოლიტიკურ კონსულტანტებს უკავშირდება, რომლებიც 8 ნოემბრის მუნიციპალური არჩევნების წინა პერიოდში უკანონოდ მუშაობდნენ პროსამთავრობო კანდიდატებისთვის.

ამ თემაზე საპარლამენტო მოსმენების დროს შინაგან საქმეთა მინისტრმა, სახელმწიფო უსაფრთხოების სამსახურის უფროსმა და გენერალურმა პროკურორმა განაცხადეს, რომ პოლიტიკური კონსულტანტების გაჯეტები, სადაც ყველა მტკიცებულება იყო შენახული, საქმეს არ შეიძლება დაერთოს, რადგან გამოძიებამ ისინი მესამე წყაროდან – იმ აქტივისტებისგან მოიპოვა, რომლებმაც რეალურად გამოააშკარავეს პოლიტიკური კონსულტანტები. ამიტომ, მათი თქმით, მთელი საქმე მხოლოდ ადმინისტრაციულ სამართალდარღვევას წარმოადგენს.

მოსაზრება: რატომ არ არის აფხაზეთის საგარეო საქმეთა მინისტრის მოსკოვში ვიზიტი უბრალო ფორმალობა

ამასობაში, ადგილობრივმა Telegram არხმა “აფხაზეთის ანალიტიკურმა ცენტრმა“ ინციდენტთან დაკავშირებით საკუთარი პოზიცია წარმოადგინა.

არხმა ჩამოთვალა კონკრეტულად ის აფხაზური კანონები, რომლებიც რუსმა სპეციალისტებმა დაარღვიეს:

• უკანონო დასაქმება პატენტის გარეშე: რუსეთის მოქალაქეებს, რომლებიც მუშაობენ ანაზღაურებად პოლიტიკურ სტრატეგებად ან ჟურნალისტებად, მოეთხოვებათ ნებართვის ან პატენტის ქონა. ამის შეუსრულებლობა წარმოადგენს პირდაპირ ადმინისტრაციულ სამართალდარღვევას.
• ვანდალიზმისა და ხულიგნობის ორგანიზება: საარჩევნო პლაკატების დამოუკიდებლად ჩამოხევა დანაშაულია, ხოლო ასეთი ქმედებების ორგანიზება დამამძიმებელ გარემოებას წარმოადგენს.
• არასრულწლოვანების უკანონო საქმიანობაში ჩართვა: მოზარდების ზემოაღნიშნულ ვანდალიზმში ჩართვა სისხლის სამართლის დანაშაულია.
• კონსტიტუციური წესრიგის საფუძვლების და ალტერნატიული არჩევნების პრინციპის შელახვა: კანდიდატებისთვის არათანაბარი პირობების განზრახ შექმნა ამახინჯებს დემოკრატიის პრინციპს.
• საარჩევნო კანონმდებლობის დარღვევა (ქრთამი): ხმის მიცემის პროცესზე გავლენის მოხდენის მიზნით ნებისმიერი ქმედებისთვის ფულის გადახდა (მათ შორის ვანდალიზმი) შეიძლება კლასიფიცირდეს, როგორც ამომრჩევლის მოსყიდვის ფორმა ან საარჩევნო კომისიების მუშაობაში ჩარევა. იმიგრაციის შესახებ კანონის თანახმად, უცხო ქვეყნის მოქალაქეებს არ აქვთ უფლება, დაასაქმონ მესამე მხარეები.
• ეროვნული უსაფრთხოების საფრთხე: უცხო ქვეყნის მოქალაქის მიერ კანონის სისტემატური დარღვევა და არჩევნების შედეგების შეცვლის მიზნით კამპანიის ორგანიზება შეიძლება ჩაითვალოს ქმედებად, რომელიც საფრთხეს უქმნის აფხაზეთის სუვერენიტეტსა და უსაფრთხოებას.
• არალეგალური მეწარმეობა: აფხაზეთის საგადასახადო და ადმინისტრაციული კანონმდებლობის თანახმად, რესპუბლიკის ტერიტორიაზე კომერციული მომსახურების (ამ შემთხვევაში, პოლიტიკური კონსულტაციის) მიწოდება რეგისტრაციის, ლიცენზირებისა და გადასახადების გადახდის გარეშე დანაშაულია.
• ნდობის ბოროტად გამოყენება და ოფიციალური ორგანოების მოტყუება: ჟურნალისტად თავის გასაღება ფაქტობრივი კომერციული და პოლიტიკური საქმიანობის დასაფარად შეიძლება კლასიფიცირდეს, როგორც თაღლითობა.
• კანდიდატებისთვის თანაბარი პირობების პრინციპის დარღვევა: პირთა ჯგუფის დაფინანსება და კოორდინაცია ოპონენტების კამპანიის განზრახ ჩასახშობად ქმნის არათანაბარ სათამაშო ველს, რაც თანაბარი არჩევნების პრინციპს ფიქტიურს ხდის.
• არალეგალური პარალელური მმართველობის სტრუქტურის ფორმირების ინიცირება: ცენტრალური მთავრობის მიერ ადგილობრივი საბჭოების კონტროლის მიზნით “მუნიციპალიტეტის დეპუტატთა ასამბლეის“ შექმნა ლეგიტიმური სამთავრობო ინსტიტუტების ჩანაცვლების მცდელობაა და არღვევს ადგილობრივი თემების სუვერენიტეტს. ასეთი ასოციაციების შექმნა შესაძლებელია მხოლოდ თავად დეპუტატების ინიციატივით საკონსულტაციო ფუნქციებისთვის.

რუსი პოლიტსტრატეგების დარღვევების ამ გრძელ სიას აფხაზეთის ანალიტიკური ცენტრი ასრულებს იმ დასკვნით, რომ მათი საქმიანობა მოიცავს როგორც კანონის პირდაპირ დარღვევებს, ასევე სისტემურ ქმედებებს, რომლებიც ძირს უთხრის კონსტიტუციურ პრინციპებს.

“ეს საშუალებას იძლევა, როგორც ადმინისტრაციული, ასევე სისხლისსამართლებრივი დევნა დაიწყოს მათი და მათი დამკვეთების მიმართ.“ – მიაჩნიათ არხის ავტორებს.