პაატა ზაქარეიშვილი: „თბილისს შეუძლია შესთავაზოს აფხაზეთსა და ცხინვალს ის, რასაც რუსეთი ვერასდროს შესთავაზებს: არა მკაცრი კონტროლი, არამედ გრძელვადიანი ურთიერთობები, მათი ადამიანური და პოლიტიკური რეალობის პატივისცემა“
ბოლო წლების აფხაზეთის პოლიტიკაში ერთ-ერთი ცენტრალური ფიგურა რუსეთის პრეზიდენტის ადმინისტრაციის ხელმძღვანელის პირველი მოადგილე - სერგეი კირიენკოა. კრემლის წარმომადგენელი კურირებს სამხრეთ ოსეთსაც, თუმცა პოლიტიკურად უფრო აქტიურ აფხაზეთში მისი საქმიანობა უფრო მეტად თვალსაჩინოა.
აფხაზეთისა და რუსეთის თანამშრომლობის ახალ ეტაპს აფხაზური მედიაპლატფორმა “აიაშარა“ რამდენიმე გადაწყვეტილების კონტექსტში განიხილავს, როგორც კონტროლირებად ინტეგრაციას – პროცესს, რომელიც, მედიის შეფასებით, აფხაზეთის თანდათანოვან შეყვანას ისახავს მიზნად რუსეთის იურისდიქციაში.
კრემლი კვლავ ააქტიურებს ინიციატივას, რომელიც დიდ რუსულ კაპიტალს აფხაზეთში საგადასახადო შეღავათებსა და განსაკუთრებულ პირობებს სთავაზობს. თავის მხრივ, აფხაზური ოპოზიცია ამას სოხუმის შიდა საქმეებში ჩარევად აღიქვამს.
