რუსული ინვესტიციების შესახებ აფხაზეთში

მომავალ კვირას აფხაზ ოპოზიციის ლიდერებს საშუალება ექნებათ პარლამენტს პირადად მოახსენონ თავიანთი უკიდურესად ნეგატიური დამოკიდებულება რუსული ინვესტიციების შესახებ შეთანხმების პროექტის მიმართ. ბევრს მიაჩნია, რომ ეს შეთანხმება, რომელიც უპრეცედენტო სარგებელს იძლევა რუსი ინვესტორებისთვის, მთლიანად ანგრევს აფხაზეთის ეკონომიკას.

აფხაზი ეკონომისტი ახრა არისთავა აფხაზეთის ეკონომიკური პრობლემების გადაჭრის განსხვავებულ გზას გვთავაზობს.

ახრა არისთავა:

“ვინც ამტკიცებს, რომ აფხაზეთში ფული არ არის, რესპუბლიკას მხოლოდ მსხვილი ინვესტორი გადაარჩენს და ასეთ ინვესტორს უნდა მიეცეს ყველანაირი სარგებელი, აქვს ერთი მიზანი – მოქალაქეების შეცდომაში შეყვანა და ვიწრო კორპორაციული ინტერესების გათვალისწინებით მანიპულირება.

თანამედროვე სამყაროში ფულის საკითხი მთლიანად წარმოებულ პროდუქტზეა დამოკიდებული. ჩვენი ეკონომიკის სამინისტრო აცხადებს, რომ აფხაზეთის მშპ იზრდება: ეს ნიშნავს, რომ შესაძლებელია ფულის გაცემა ყველა მოქალაქის შრომის შედეგის ღირებულების 50 პროცენტამდე. რადგან ჩვენ არ გვაქვს საკუთარი ვალუტა და ვიყენებთ რუსულ რუბლს, სავსებით ბუნებრივია, რომ რუსეთმა ჩვენი მუშაობის შედეგების მიხედვით მოგვაწოდოს რუბლი.

და საუბარია არა საჩუქარზე, არამედ გრძელვადიან სესხებზე, როგორც ეს იყო 2009 წელს, როდესაც რუსეთის ბანკმა აფხაზეთის ეროვნულ ბანკს დიდი სესხი გამოუყო.

თუმცა, 2020 წლიდან მსგავსი სესხის აღება ვეღარ მოხერხდა. შედეგად, აღმასრულებელმა ხელისუფლებამ ვერ გადაჭრა ეკონომიკის ძირითადი საკითხები – საკუთარი წარმოების ზრდა და ექსპორტის ზრდა.

ჩვენ ჩარჩენილი ვართ 7 მილიარდი რუბლის ამარა [დაახლოებით 73 მილიონი აშშ დოლარი], ჩვენ ვერ შევინარჩუნეთ დადებითი სავალუტო ბალანსი საგარეო ვაჭრობაში, რომელიც განვითარდა 2020 წლისთვის, და შედეგად, ახლა არ არსებობს საშუალება, უარი ვთქვათ რუსეთთან თანამშრომლობაზე. ანუ ჩვენ არ შეგვიძლია საჯარო სექტორისთვის ხელფასების დაფინანსება და პრემიების დამოუკიდებლად გადახდა, როგორც ეს დაგეგმილია 2025 წლისთვის.

ხელისუფლებამ ვერ მიაღწია თავის დასახულ მიზანს. მაგრამ ექსპერტები მთელი ამ წლების განმავლობაში აფრთხილებდნენ, რომ უმოქმედობა აუცილებლად გამოიწვევდა კრიზისს.

ფაქტობრივად, რესპუბლიკაში შექმნილი ფულის დეფიციტი ხელოვნურია. აფხაზეთის ეროვნულ ბანკს აქვს უფლება მოსთხოვოს რუსეთს ჩვენი მთლიანი შიდა პროდუქტის შესაბამისად, მინიმუმ 17 მილიარდი რუბლი [დაახლოებით 177 მილიონი აშშ დოლარი] ადგილობრივი მეწარმეებისთვის 5-10 წლით დაბალ საპროცენტო განაკვეთით გრძელვადიანი სესხების გაცემისთვის.

თუმცა, ეს მოითხოვს ხელისუფლების მხარდაჭერას, რომელიც მხარს უჭერს რესპუბლიკის განვითარების გეგმას. ახლა კი რეალური პრობლემების გადაჭრის ნაცვლად, ცდილობენ დაგვარწმუნონ, რომ უცხოელი ოლიგარქებისთვის სარგებლის გარეშე ჩვენ გავქრებით და ეს არის აბსოლუტური მანიპულაცია.

აფხაზეთის ეკონომიკაში ინვესტირების საკმაოდ დიდი გამოცდილებაა. კერძოდ, ისეთი მსხვილი რუსული კომპანიები, როგორიცაა Megafon, MTS, Rosneft და მრავალი სხვა, დიდი ხანია შემოდიან ადგილობრივ ბაზარზე. და იმისთვის, რომ აფხაზეთში თავიანთი ბიზნესი განავითარონ, არც სუპერ შეღავათები, სუპერ პირობები, სუპერ გარანტიები მოითხოვეს.

ნებისმიერი ბიზნესი ყოველთვის შეიცავს გარკვეულ რისკებს. მაგრამ ის მსხვილი ინვესტორები, რომლებიც ჩამოვთვალე, აფხაზი ხალხისა და აფხაზეთის პატივისცემით იქცეოდნენ და იქცევიან ასე. მათ ესმით, რომ გადასახადები უნდა გადაიხადონ ყოველგვარი შეღავათების გარეშე.”